Tatsulok

TATSULOK

napakahirap din sa pamilya ng mayayaman

na ang anak ay mahuli't makulong sa piitan

lalo na't nakuha'y kush o dwarf marijuana naman

halos isang kilo, milyon ang halaga, O, Bayan

anak ng Kalihim ng Katarungan ang nadakip

na marahil madaragdag sa kulungang masikip

lumaya kaya agad kung may perang halukipkip?

hustisya kaya'y laruin nang anak ay masagip?

mabuti't nahuli, di pinaslang, tulad ng iba

na sa "War on Drugs" ay kayraming buhay ang wala na

patuloy pa ring lumuluha ang maraming ina

dahil pinaslang ang mahal na anak at asawa

ang anak-mayaman, nahuli na, ngunit kulong lang

sa dukha'y walang proseso, agad na pinapaslang

sabi pa'y nanlaban, kaya daw binirang tuluyan

hanggang ngayon, hanap ng mahal nila'y katarungan

"at ang hustisya ay para lang sa mayaman", sabi

sa awiting Tatsulok, ganito ba'y nangyayari?

katotohanang awit nang bata'y di magpagabi?

ah, tatsulok na'y baligtarin ng nakararami!

- gregoriovbituinjr.

10.14.2022

* mga litratong kuha sa google

Numero Uno na lang

NUMERO UNO NA LANG

mabubuo na rin ang sudoku

pag nalagay lahat ng numero

pagmasdan mo ang nasa litrato

natira rito'y numero uno

ganitong laro'y nakakatuwa

pampasaya, dama mo'y ginhawa

sa bakanteng oras ginagawa

upang pagpahingahin ang diwa

dati, sinasagutan ko'y aklat

ng sudoku, ngayon, app na lahat

doon na nagsusudokung sukat

laro'y lohika't nadadalumat

tara, minsan, magsudoku ka rin

at ang sarili mo'y pasayahin

huwag lang kalimutang kumain

upang katawan ay lumusog din

- gregoriovbituinjr.

10.14.2022

Kanin

KANIN

isang tasang kanin ay sapat na

nang diabetes ay maiwasan

sa bahay man o sa karinderya

ang kalusugan na'y alagaan

staple food ang kanin sa Pinas

pangunahing pagkain sa atin

bakit ngayon dapat kang umiwas

gayong ito'y staple food natin?

mahalagang masagot ang bakit

sa staple food sa ating bansa

sana noong bata pa'y giniit

nang diabetes maiwasan nga

sana'y sa paaralan tinuro

tayo'y baka magkaka-diabetes

pag kayraming kaning isinubo

sana ngayon ay di nagtitiis

nang maiwasan habang maaga

iyang carbohydrates sa katawan

ah, hanggang sana nga lang talaga

habang patuloy pa sa gamutan

- gregoriovbituinjr.

10.13.2022    

Talanwang

TALANWANG

may lumang salita pala / tayong katugma ng aswang

sa walang utang na loob, / kahulugan ng talanwang

di man lang magpasalamat, / puso ma'y nakabuyangyang

sa pinagkakautangan / ng loob, para kang timang

bakit di magpasalamat / kung nabigyan ka ng pabor

sapagkat katumbas nito'y / ang dignidad mo o honor

halimbawa'y nabigyan ka / ng magulang mo ng motor

kung walang pasasalamat, / que barbaridad, de horror

pinag-aral ng magulang / hanggang ikaw ay lumaki

naging maganda ang kutis, / bumulas na binibini

nang magkaroon ng syota, / sumama na sa lalaki

"wala kang utang na loob," / ina mo sa iyo'y sabi

isa ka nga bang talanwang? / anong sakit na salita

masabihan ka nang ganyan, / tila puso'y hinihiwa

huwag magpadalus-dalos / sa mga pasya mong sadya

ay, alalahanin mo rin / ang magulang mong dakila

kung nasa tamang edad na / ay saka ka na magpasya

huwag hayaang mahulog / sa lilim ng punong mangga

lagi kang magpasalamat / sa nakamit na biyaya

huwag kang maging talanwang, / mahalin ang ama't ina

- gregoriovbituinjr.

10.12.2022

* talanwang - [Sinaunang Tagalog] walang utang na loob

(mula sa UP Diksiyonaryong Filipino, pahina 1212)

Komunal

KOMUNAL

mabigat ang imaheng umuukilkil sa isip

kapara ng balaraw na sa likod ko'y humagip

may pag-asa bang ang bayang nagdurusa'y masagip

sa kuko't bituka ng mapagsamantala't sipsip

noong primitibo komunal, walang pang-aapi

lahat ay nagbibigayan, walang makasarili

may paggagalangan, kapwa'y di isinasantabi

tribu'y pinangangalagaan ng mga bagani

sa panahon ngayon ng paghahari ng agila

kapitalistang nabundat na'y nais bumundat pa

habang manggagawa'y tila langgam sa sipag nila

mababang sweldo'y pinagtitiyagaan talaga

pribadong pag-aari ang ugat ng kahirapan

kaya mayamang iilan ay lalong yumayaman

habang laksang dukha'y batbat pa rin ng karukhaan

anumang sipag at tiyaga'y di pa rin umalwan

abanteng lipunang komunal ang pinapangarap

matayo ang lipunang makatao't mapaglingap

upang dukha'y maiahon sa kumunoy ng hirap

lalo't uring manggagawa'y magkakaisang ganap

- gregoriovbituinjr.

10.11.2022

_abag

_ABAG

tulong daw sa Sebwano ay abag

alitan at suntukan ay babag

hangin sa tiyan naman ay kabag

pakiramdam ng awa ay habag

di pagsunod sa batas ay labag

paggutom sa kakatayi'y tabag

at tunog ng paghakbang ay yabag

- gregoriovbituinjr.

10.11.2022

* abag - mula sa UP Diksiyonaryong Filipino, p. 1

* tabag - mula sa UPDF, p. 1195

Makatang lungsod

MAKATANG LUNGSOD

ako'y isang makatang lungsod

na pagtula'y ikinalulugod

maralitang kayod ng kayod

matatag, matibay ang tuhod

tula'y hinggil sa mga kwento

sa mga lansangang narito

na sementado't aspaltado

maging katawang buto-buto

makinang na ilaw sa gabi

mga nagkikinangang poste

maririkit ditong babae

kwento rin ng tuso't salbahe

ang mahahabang eskinita

ang naglulutangang basura

maruruming ilog at sapa

mga dyip na nagkakarera

madalas magbilang ng pantig

sa tugma't sukat niyang hilig

sa manggagawa'y kapitbisig

isyu nila'y sinasatinig

isang makata ng Sampaloc

sinusunod ang tinitibok:

bilin sa awiting Tatsulok

ang dukha'y ilagay sa tuktok

- gregoriovbituinjr.

10.10.2022