Hustisya sa mga dalagita't batang pinaslang

HUSTISYA SA MGA DALAGITA'T BATANG PINASLANG

sa loob lang ng isang linggo'y nabalità

dalawang kinse anyos yaong ginahasà

at pinaslang, habang otso anyos na batà

nama'y pinaslang ng tiyuhing walang awà

ganyang mga ulat nga'y karima-rimarim

nangyari sa kanila'y talagang kaylagim

budhi ng mga gumawa'y uling sa itim

kung ako ang tatay, mundo ko na'y kaydilim

kung anak ko silang sa puso'y halukipkip 

tiyak na nangyari'y di ko lubos maisip

ilang araw, buwan, taon kong di malirip

ang mga suspek na halang, sana'y madakip

kung di man baliw, baka mga durugista

yaong mga lumapastangan sa kanila

ang maisisigaw ko'y hustisya! hustisya!

hustisya sana'y kamtin ng tatlong biktima!

- gregoriovbituinjr.

01.17.2026

* headline sa pahayagang Pang-Masa, Enero 10, 2026, at pahayagang Bulgar, Enero 13 at 17, 2026

Katha't nilay

KATHA'T NILAY

nagpapasalamat akong totoo

sa bawat kasama't mga katoto

na sa maraming labanan at isyu

ay nagkaisang magtagumpay tayo

pag may isyu nga akong natitisod

susuriin, aalamin ang buod

gagawan na ng tula't ia-upload

kapara ng busóg, palaso't tunod

pag sa mga isyu'y di mapalagay

ay magsasaliksik ng walang humpay

habang prinsipyo'y isinasabuhay

at hanay ay ating pinatitibay

makatâ mang walâ sa toreng garing

iwing diwa'y mananatiling gising

trapo't burgesya man ay sumingasing

ang masa'y di mananatiling himbing

salamat, kadukha't kamanggagawà

sa tulong kahit daanan ng sigwâ

kakathâ at kakathâ ang makatâ

bilang ambag sa layuning dakilà

- gregoriovbituinjr.

01.17.2026

Pagpupugay kina Alex Eala at Carlos Yulo!

PAGPUPUGAY KINA ALEX EALA AT CARLOS YULO!

dalawang matinding atletang Pinoy

ang pinarangalan, kahanga-hangà

pagpupugay kina Alex at Caloy

na binigyang karangalan ang bansâ

pinagbuti ang isports na pinasok

isa'y sa gymnastics, isa'y sa tennis

nagkampyon, nagkaginto, nasa rurok

pag-angat sa isports nila'y kaybilis

sports king at sports queen, anong husay

batid ng bansang sila'y nagsisikap

laging nag-eensayong walang humpay

nang matupad ang kanilang pangarap

mundo ng isports ay parang nilindol

ng atletang Pinoy na kaygagaling

pagpupugay sa inyo, mga aydol

at sa inyong isports, bansa'y nagising

- gregoriovbituinjr.

01.17.2026

* ulat mulâ sa pahayagang Remate, Enero 17, 2026, p.12        

Payò sa tulad kong Libra

PAYÒ SA TULAD KONG LIBRA

di ako mahilig sa horoscope subalit

mahilig ako sa pagsagot ng sudoku

ngunit dahil sa dyaryo sila'y magkatabi

ay nababasa ko ang Libra, horoscope ko

tulad ngayong araw, anong ganda ng payò

piliin daw ang mga taong nagbibigay

ng katahimikan, kayganda ng nahulô

ibig sabihin, ang nanggugulo'y layuan

katahimikan ng loob ang sabing ganap

kapanatagan at ginhawa'y madarama

kaysa mapanira't magugulo kausap

payapang puso't diwa'y kaysarap talaga

di man ako naniniwalà sa horoscope

ang nabasa ko'y talagang malaking tulong

upang positibong enerhiya'y mahigop

lalo't sa mabuting pakiramdam hahantong

horoscope sa sikolohiya'y may epekto

na tilà pinapayuhan ng kaibigan

lalo't mag-isa na lang ang gaya kong bálo

kung may peace of mind, payapa ang pakiramdam

- gregoriovbituinjr.

01.16.2026

* mula sa pahayagang Abante Tonite, Enero 16, 2026, p.7

Sa 3rd Black Friday Protest ng 2026

SA 3RD BLACK FRIDAY PROTEST NG 2026

patuloy pa tuwing araw ng Biyernes

ang pagkilos laban sa tuso't balakyot

isang commitment na ang Black Friday Protest

upang mapanagot ang mga kurakot

di pa humuhupà ang gálit ng bayan

sa katiwalian nitong mga trapo

nakabibingi na ang katahimikang

akala'y payapa ngunit abusado

talagang kinawat nitong mandarambong

ang pondo ng bayang sinarili nila

karaniwang tao'y saan na hahantong

kung lider na halal ay kurakot pala

nagpapahiwatig iyang ghost flood control

at mga pagbahâ sa mga kalsada

ng sistemang bulok na sadyang masahol

kaya ang sistema'y dapat palitan na!

magpapatuloy pa ang Black Friday Protest

sa pagpoprotesta'y di tayo hihintô

titiyakin nating ito'y walang mintis

nang maparusahan ang sangkot, mapiit

- gregoriovbituinjr.

01.16.2026

* maraming salamat sa kumuha ng litrato

Pagpupugay kay Atty. Rafa!

PAGPUPUGAY KAY ATTY. RAFA!

pagpupugay, Attorney Rafael La Viña!

magaling, mahinahon, mabuting kasama

ngayong taon, isa sa mga nakapasá

sa bar exam at ganap na abogado na

mahusay na lider ng ilang taon dito

sa Bukluran ng Manggagawang Pilipino

malaking tungkulin ang maging abogado

lalo pa't naglilingkod sa uring obrero

muli, isang taaskamaong pagpupugay

uring manggagawà ay paglingkurang tunay

maraming aping obrero ang naghihintay

sa serbisyo mo't kasipagang walang humpay

at kami nama'y nakasuporta sa iyo

upang mapagkaisa ang uring obrero

nawa'y maging matagumpay kang abogado

ng bayan, ng obrero't karaniwang tao

- gregoriovbituinjr.

01.16.2026

Alex Eala, kampyon ng Kooyong Classics sa Melbourne

ALEX EALA, KAMPYON NG KOOYONG CLASSICS SA MELBOURNE

"MANILA, Philippines–Alex Eala was crowned champion of the 2026 Kooyong Classic ahead of her Australian Open debut.

The Kooyong Classic named Eala the women’s singles champion of the professional exhibition event held in Melbourne.

The Filipino tennis sensation received the Evonne Goolagong Cawley Trophy, named after the former World No. 1 Australian netter and seven-time Grand Slam champion." - ulat mula sa Philippine Daily inquirer

https://sports.inquirer.net/658741/alex-eala-crowned-kooyong-classic-champion

kaygandang ulat ang natunghayan

nagkampyon na si Alex Eala

sa Kooyong Classics sa Australia

na laban ay talagang pukpukan

tinalo niya si Donna Vekic

ng Croatia, ng dalawang beses

pag-angat ni Alex ay kaybilis

pagkat talaga namang matinik

Kooyong Classics ay ginaganap

tuwing Enero doon sa Melbourne

laban bago ang Australian Open

nakamit ni Alex ang pangarap

sa Australian Open ay sasabak

itong pambato ng Pilipinas

husay nawa'y muling ipamalas

pagiging kampyon sana'y matiyak

- gregoriovbituinjr.

01.16.2026

* litrato mula sa inquirer.net