Kalbaryo ng Manggagawa't Maralita

Kalbaryo ng Manggagawa't Maralita

palpak nga ang rehimeng ito sa pangangalaga

sa kapakanan ng mamamayan ng kanyang bansa

kalbaryo ang kahirapang palubha ng palubha

na kaytindi ng pagtama sa manggagawa't dukha

di ba't ang lockdown ay di solusyon sa COVID-19

kundi ayusin ang buong Philippine health care system

dagdag-pondo sa kalusugan, at libreng mass testing

para sa lahat, pagpapaigting sa contact tracing

patuloy din ang kalbaryo ng kontraktwalisasyon

milyun-milyon din ang nawalan ng trabaho ngayon

pabrika'y nagsarahan dahil sa pandemyang iyon

ramdam nila'y di sapat ang ayuda kung mayroon

patuloy ang giyera sa droga't mga pagpaslang

wastong proseso ng batas ay di na iginalang

libu-libong dukha ang basta na lang tinimbuwang

dahil atas ng rehimeng uhaw sa dugo't bu-ang

ang di disenteng paninirahan ay kalbaryo rin

sa mga maralitang batbat na rin ng bayarin

sa kuryente, tubig, upa, kayrami nang singilin

idagdag pa ang mahal na pangunahing bilihin

ang mga manggagawang ito'y saan ba kakapit

maralitang walang trabaho'y talaga ring gipit

pamilya ng tinokhang, patuloy na nagagalit

tratuhing maayos ang sa ospital maaadmit

kaya sa Kalbaryo ng Manggagawa't Maralita

panawagan namin ay hustisya para sa madla

dapat ayusin ang sistema ng pamamahala

sa mga kapalpakan ay singilin ang maysala

kung di ito maaayos, dapat lang patalsikin

ng sambayanan ang maysalang bulok na rehimen

na sa karapatang pantao'y karima-rimarim

na sa panlipunang hustisya'y nagdulot ng lagim

- gregoriovbituinjr.

* litrato mula sa google