MERYENDA
meryenda ko'y pandesal at tsaa
habang may naninilay tuwina
na samutsaring paksa ng masa
na sinusulat ko kapagdaka
madaling araw, nananaginip
ngayong umaga'y may nalilirip
mga isyung aking halukipkip
at solusyong walang kahulilip
lipunang makatao'y pangarap
nang dukha'y makaahon sa hirap
na asam na ginhawa'y malasap
at maibagsak ang mapagpanggap
kayrami pang tulang kakathain
mga kwento't isyung susulatin
pati nobelang pangarap gawin
ay palagiang iniisip din
tara, magmeryenda muna tayo
habang nagpapalitan ng kwento
halina, at saluhan mo ako
kahit payak ang meryendang ito
- gregoriovbituinjr.
03.30.2025
No comments:
Post a Comment