PUYAT AT TAKIPSILIM NG MAKATANG GLEN SALES
naranasan ko ring puyat sa takipsilim
sapagkat magdamag kong inalam ang lihim
ng mga Sangre na lumalaban sa lagim
ng mga hunyangong di makita sa dilim
sinusulat ko ang anumang natitiis
taludtod ko't saknong ay binibigyang hugis
nang matunghayan yaong tula ni Glen Sales
kamakata, katoto, sa tula'y kabigkis
sa kamakatang Glen, mabuhay ka, mabuhay
dahil nalathala ka muli sa Liwayway
tulang Puyat at Takipsilim ay natunghay
kaya sa iyo'y taasnoong pagpupugay
magkasunod na buwan pa, Hunyo at Hulyo
habang ako'y di pa malathalang totoo
sana'y malathala ka muli sa Agosto
muling ipakita ang husay mo, saludo!
- gregoriovbituinjr.
07.19.2025
No comments:
Post a Comment