BUWAYA
buwaya ba'y naroroon lang sa mga zoo?
o nasa malalalim na ilog lang ito?
bakit buwaya'y turing sa nasa Kongreso?
sa Senado, o sa mga bundat na trapo?
buwaya - katawagan sa mga kurakot
sa pondo ng bayan, mga gawaing buktot
pahirap sa bayan silang mga balakyot
mga mandarambong silang dapat managot
anong petsa na? buwaya'y naglipana pa
sa mga bulwagan ng gobyerno't burgesya
nagpapasasâ sa yamang likhâ ng masa
nasanay mambola upang iboto sila
dapat manggagawa't dukha'y magkapitbisig
at mga kurakot ay kanilang mausig
hunyango't dinastiya'y tuluyang malupig
sistema'y baguhin, iyan ang aming tindig
- gregoriovbituinjr.
02.26.2026
* litrato kuha sa rali sa Edsa, 02.26.2026
No comments:
Post a Comment